​តាកែវ៖ ស្ត្រី​ម្នាក់​ត្រូវ​សមត្ថកិច្ច​នគរបាល​ស្រុក​ត្រាំកក់​ខេត្តតាកែវ​បាន​ឃាត់ខ្លួន​តាម​ពាក្យបណ្តឹង​របស់​ជនរ​ង​គ្រោះជា​ម្ចាស់​ម៉ូតូ​ក្នុងករណី​ឆបោក​។​ ជនសង្ស័យ​ត្រូវបាន​ឃាត់ខ្លួន​នៅ​ចំណុច​ភូមិ​ដីក្រហម ឃុំ​ត្រពាំង​អំពិល ស្រុក​គងពិសី ខេត្តកំពង់ស្ពឺ​កាលពី​ថ្ងៃទី​៩ ខែកុម្ភៈ ឆ្នាំ​២០១៩​។​

​សមត្ថកិច្ច​នគរបាល​ស្រុក​ត្រាំកក់​បានបញ្ជាក់​ថា​ជន​សង្ស័យ​មានឈ្មោះ ​សំ​ ស្រី​ពៅ ​ភេទ​ស្រី​​ អាយុ​២៣​ឆ្នាំ មាន​ទីលំនៅ​ភូមិ​ដីក្រហម ឃុំ​ត្រពាំង​អំពិល ស្រុក​គងពិសី ខេត្តកំពង់ស្ពឺ​ សព្វថ្ងៃ​ស្នាក់នៅ​ផ្ទះជួល ភូមិ​អង្គតាសោម ឃុំ​អង្គតាសោម ស្រុក​ត្រាំកក់ ខេត្តតាកែវ​។​ជនរងគ្រោះ​ឈ្មោះ ហម ភា​រិត ភេទ​ប្រុស អាយុ ២៥ ឆ្នាំ មាន​ទីលំនៅ​ស្រុក​ត្រាំកក់ ខេត្តតាកែវ ។​

​ក្រោយពី​ឃាត់ខ្លួន​ជនសង្ស័យ​ត្រួវ​សមត្ថកិច្ច​សាកសួរ​កសាង​សំណុំរឿង​តាម​នីតិវិធី​។​ចំណែក​វត្ថុតាង​ម៉ូតូ ត្រូវបាន​ប្រគល់ជូន​ម្ចាស់​ដើម​វិញ​៕